Temporaryo nga ginpasirad-an ang New City Hall sang Talisay Negros Occidental umpisa subong nga adlaw Hulyo 30, 2020, para sa maid-id nga disinfection.
Ini matapos nahibaluan nga nagproseso sang business permit renewal, ang isa ka Bacolodnon nga positibo sa Covid-19.
Suno kay City Administrator Atty. Jonathan Ealdama, ini nga persona ang bana sang doktor nga una nagpositibo sa Covid-19 sa syudad sang Bacolod.
Dugang pa ni Ealdama, nagpositibo man ang bata sang mag-asawa, samtang nagbatyag sang simtomas sang Covid-19 ang sekretarya nga nakaupod sang bana sa pagproseso sang renewal sa City Hall.
Magabalik ang operasyon sa Agusto 3.
Samtang, suspendido man ang trabaho sa City Hall sang syudad sang Bago Negros Occidental subong Hulyo 30, 2020, bangud sa decontamination nga patigayunon sa compound kag mga talatapan sini.
Ini ang ginmando ni Mayor Nicolas Yulo, matapos nahibaluan nga naka contact sa LSI nga positibo sa Covid-19, ang utod sang isa sa mga empleyado sang City Hall.
Suno sa alkalde, ini nga LSI ang nagpadulong sa Land Transportation Office Bacolod nagligad nga adlaw, nga amo ang rason kun ngaa ginpaidalom sa lockdown ang amo nga opisina.
Dugang pa ni Yulo, nga basi sa palayag sang mga doktor, makabig lamang nga secondary contact ang empleyado sang City Hall, apang kinahanglan nga mapatigayon ang decontamination bilang isa sa mga preventive measures. | Aksyon Marlon Genovea