Ginkumpirmar ni Regional Training Center Dir. Supt Jimmy Laguyo nga may naglupok nga ugat sa utok ni PO1 Frenz Galen Fradez nga gintunaan sang iya kamatayon kahapon sa Intensive Care Unit sang Corazon Locsin Montelibano Memorial Regional Hospital (CLMMRH).
Suno kay Laguyo sang tinalikdan nga Miyerkules (Oct. 9, 2018) alas 7:10 sang gabi naglain ang pamatyag ni Fradez samtang ginahimo ang physical excercise sa sulod sang Regional Training Center sa Bakyas, Mansilingan kag gilayon ini nga gindala sa Doctors Hospital agud mabulong.
Dugang pa ni Laguyo bangud kulang sa pasidilidad ang amo nga ospital ginsaylo si Fradez sa ICU sang CLMMRH.
Dugang pa gid ni Laguyo gintinguhaan pa kon tani sang doktor nga ma-revived si Fradez apang napatay ini alas 11:45 kahapon sang aga (Oct. 10) paagi sa deklarasyon ni Dr. Michael Jun Bañez.
Ginaproseso na ni Laguyo ang mga dokumento antis idul-ong ang bangkay ni Fradez sa ila puloy-an sa banwa sang San Jose sa probinsya sang Antique.
