BACOLOD VENDORS’ PLAZA NAGA PABILIN NGA BUKAS PARA SA MGA SIDEWALK VENDORS

Share on facebook
Share on google
Share on pinterest
Share on twitter
Share on print

Naga pabilin nga bukas ang Bacolod Vendors’ Plaza para sa mga sidewalk vendors sadto nga na apektuhan sa clearing operation sa downtown area.

Ini suno kay Executive Assistant Ernesto Pineda, cluster head on market, angut sa liwat nga pag patuman sang road clearing operations 2.0.

Suno kay Pineda, nahatag na sadto ang lugar para sa mga displaced vendors apang kalabanan sa ila ang wala nag baligya sa vendors plaza.

Dugang pa ni Pineda, wala na dapat sang istoryahan kag ini ang liwat na lamang nga ipatuman bangud ini na ang gin kasugtan sadto.

Ang vendors plaza ang may kapin 500 ka mga pwesto nga may kadakuon nga 1 feet by 1 1/2.

Gina tugyan na ni Pineda sa mga displaced vendors ang desisyon kon maga baligya sila ukon indi bangud istrikto na nga ipatuman sang City Legal Office Enforcement Team ang pag panghawan sa downtown area.

DUHA PILASON SA INSIDENTE SANG PAGPANGLABU SA CALATRAVA

Ginabulong karon sa San Carlos City Hospital ang 56 anyos nga amay matapos ginlabu sang mag-utod las 10:15 kagab-i sa Sitio Atabay, Barangay San Isidro, banwa sang Calatrava.

Ang biktima ginkilala kay Francisco Boliboli samtang ang mga suspek amo sanday Felipe Retable ,60 anyos, kag manghod sini nga si Bobby, 47 anyos, lunsay  residente sang amo nga lugar.

Sa inisyal nga pagpangusisa ni PMaj. Roberto Indiape, bangod gid lamang sa sa personal nga away kag kutsukutso, ginsulong sang mag-utod ang biktima ginbuno  kag ginlabu. 

Si Boliboli ang nakaangkon sang pilas sa likod sang lawas kag butkon.

Sa amo nga insidente, nakita ni Atellano Jorolan (umagad sang biktima) nga ginalabu sang mag utod ang  iya ugangan,  nagkuha man ini sang binangon kag ginlabu si Ratable.

Una nga gindala si Boliboli sa Calatrava District Hospital kag gilayon ginforward sa San Carlos City Hospital samtang si Ratable ang ginabulong sa Corazon Locsin Montelibano Memorial Regional Hospital.

Sa follow-up opreration sang kapulisan, nadakpan si Bobby samtang si Felipe ang buluntaryo nga nagsurender sa mga otoridad. | Aksyon Alvin Grava

DUHA GINDALA SA HOSPITAL MATAPOS ANG AKSIDENTE SA BARANGAY ALIJIS

Gindala sa hospital ang duha ka mga sakay sang motorsiklo matapos na aksidente sa atubang sang Shell gasoline station sa dalan Alijis, syudad sang Bacolod, Sabado sang gab-i.

Ginkilala ang driver sang motorsiklo nga si Rossfel Musni, residente sang Kabugwason, Barangay Mansilingan kag ang backrider sini nga si Lindy Lynn Arevalo, residente sang DC 1 RPHS, Barangay Alijis.

Ang mga biktima ang gikan sa birthday party kag papuli na sang natabo ang aksidente nga pagbunggo sa Toyata Innova nga ginamaneho ni Jennifer Genita, 41 anyos, sang City High, Barangay Taculing.

Ang motorsklo ang gikan West padulong East nga direksyon samtang ang Innova ang gikan East to West.

Suno kay Police Senior Master Sargeant Clark Cañon, traffic investigator sang Police Station 7, base sa alegasyon ni Genita, iya nakita nga ang motorsiklo ang yara sa center lane kag naga ikis-ikis ang dalagan rason nga nag nagbahar ini kag nagdesisyon nga maglikaw paagi sa pagtabok sa pihak nga dalan, pero nagbalik sa iya linya ang motorsiklo nga nangin kabangdanan sang aksidente.

Dugang pa ni Cañon, ginpahayag man ni Genita, nga iya ginalantaw nga base magliko ang motorsiklo.

Makita nga ang damage sang innova ang yara sa tuo sa una.

Suno kay Cañon, magabalik ini sa lugar sang insidente kag i-check ang mga CCTV.

Suno sa mga responder, conscious ang duha ka mga biktima sang gindala sa hospital.

MORE STORIES:

LIKE US ON FB

error: Ooops... You are not authorized to copy this content.