Gin umpisahan na sang lokal nga panguluhan sa syudad sang Bacolod ang pag preparar sang kinahanglanon nga mga logistics angut sa natalana nga pag operar sang Bacolod Queen of Mercy Hospital Inc. bilang COVID-19 temporary hospital.
Suno kay City Administrator Em Ang, ini nga lihok ang kabahin sang natalana paga pirmahan nga memorandum of agreement sa tunga sang management sang amo nga hospital kag ni Mayor Evelio Bing Leonardia paagi sa resolusyon nga gin aprobahan sang konseho nga nag hatag sang otoridad sa alkalde.
Dugang pa ni Ang, sa idalum sang gina proponer nga MOA, obligasyon sang syudad ang pag provide sang pila ka mga hospital equipments kag napulo ka mga city paid nurses nga amo ang maga bulig sa pag tatap sang mga posible pasyente nga paga dal-on sa amo nga hospital sa palaabuton.
Suno pa sa City Administrator, natalana nga paga gamiton sa amo nga proyekto ang South wing building sang hospital sa diin may yara sang 34 tanan ka mga kwarto nga usaron bilang isolation room.
Ang hospital ang maga tatap sa mga pasyente nga may mild kag moderate nga mga sintoma sang COVID-19.
Base sa datus sang syudad, 20 lamang ka mga isolation rooms ang available sa mga pribado nga hospital sa palibot sang syudad samtang 16 naman ang yara sa Corazon Locsin Montelibano Memorial Regional Hospital. | Aksyon Art Tayhopon
