BACOLOD NAGAHULAT SANG GUIDELINES SA VACCINATION PROGRAM

Share on facebook
Share on google
Share on pinterest
Share on twitter
Share on print

Gina hulat pa sang lokal nga panguluhan sa syudad sang Bacolod ang naga kaigo nga guidelines gikan sa National IATF angut sa implementasyon sang COVID 19 vaccination program sa bilog nga pungsod.

Suno kay City Legal Officer Atty. Joselito Bayatan, apisar nga may yara na sang dihon nga plano kag programa ang gintukod nga Covid Vaccination Council sang syudad kinahanglanon nila sa gihapon ang komprehensibo nga guidelines nga amo ang mangin basehan sa natalana nga pagpa gwa sang Executive Order sang Alkalde.

Dugang pa ni Bayatan, dako ang mangin papel sang tagsa ka mga opisyales sa Barangay angut sa amo nga programa indi lamang sa education campaign ilabi na ang pag tumod sa mga indibidwal nga mangin target bilang benepisaryo sang amo nga bakuna.

Suno pa kay Bayatan, natalana man nga maga pa gwa sang consent form ang syudad nga amo ang paga pirmahan sang mga pumuluyo nga handa sa pagpabakuna ilabi na nga boluntaryo lamang ang ipatuman nga sistema. | Aksyon Art Tayhopon

ANAY POLICE ASSET, NADAKPAN SA BUY-BUST OPERATION

Nadakpan ang isa ka persona nga nagabaligya sang frozen foods kag anay police asset sa buy-bust operation sang Police Station 8 sa Barangay Singcang-Airport syudad sang Bacolod, Biernes sang gab-i.

Gin kilala ang nadakpan kay Remo Togores, 34 anyos kag pumuloyo sang Purok Mainabyanon Brgy. Singcang-Airport syudad sang Bacolod.

Narekober kay Togores ang anom ka sachet sang suspected shabu, shabu paraphernalia nga may market value nga 14 mil pesos.

Suno kay Police Major Jun Ray Batadlan, hepe sang Police Station 8, masobra duha ka bulan ang ila surveillance kag nadakpan si Togores.

Priso si Togores sa Police Station 8 kag napasaka na ang kaso nga paglapas sang R.A. 9165 Comprehensive Dangerous Drug Act of 2002. | Aksyon Eric Magbanua

RESORT NGA NAGPATIGAYON SANG FOAM PARTY, GINPASIRA

Gin kumpirmar ni City Administrator kag EOC Executive Director Em Ang ang gin himo sang syudad nga pagpasira sang resort sa Barangay Pahanocoy syudad sang Bacolod nga nagpatigayon sang Foam Party pagkatapos sang blessing tinalikdan nga semana.

Suno kay Ang, base sa imbistigasyon nga gin patigayon sang EOC, klaro nga may yara sang na komitir nga bayolasyon ang pamunuan sang resort ilabi na nga wala nila gin pahibalo ang Punong Barangay sa lugar angut sa nga aktibidad magluwas lamang sa blessing activity nga ila gin pangayuan sang pahanugot.

Dugang pa ni Ang, nagpatigayon man sang inspection ang mga personnel sang Permits and Licensing Division sa lugar sa diin ila na diskobrehan nga ini ang wala pa sang kumpleto nga mga permit agud sa pag bukas sang ila operasyon.

Ang amo nga closure order ang gin serbe sang Biernes sang hapon, Enero 22 paagi sa talatapan sang City Legal Office kag Permits and Licensing Division. | Aksyon Art Tayhopon

MORE STORIES:

LIKE US ON FB

error: Ooops... You are not authorized to copy this content.