Nagahulat ang syudad sang Bacolod sa panibag-o nga guidelines nga ipagwa sang National Inter-Agency Task Force angot sa ipatuman nga Modified General Community Quarantine ukon MGCQ umpisa Mayo 16.
Subong nga adlaw, Mayo 13 sang ginligwat sang National Government ang desisyon nga ipaidalom sa MGCQ ang mga lugar nga ginakabig low-risk area.
Luyag ni Leonardia nga ang ipagwa nga impormasyon sang syudad ang detalyado kag nagasunod sa pagsulondan sang nasyunal.
Gina paabot sang Alkalde nga may yara man sang ipagwa nga guidelines ang hanay sang transportasyon kag business sector angot sa kon ano ang matabo sa Mayo 16.
Pero suno sa Alkalde, magapabilin ang ano man nga measures nga ginapatuman sa syudad tubtub nga wala pa sang makagwa sang panibag-o nga guidelines ang National Inter-Agency Task Force.
Suno kay Leonardia, para sa mga border sa syudad, ginpahayag sa iya ni Bacolod PNP Director Col. Henry Biñas nga magapabilin ang ginpahamtang nga checkpoints sa mga border kag malikawan ang pagsulod sang illegal nga transaksiyon kaangay sa illegal drugs.
Nagalaom si Leonardia nga makapagwa sang temprano guideline agod makahimo ang syudad sang nagakaigo nga tikang agod mapabilin ang health protocols ilabi pa nga posible yara pa ang presensiya sang virus.
Ang Bacolod ang may 11 ka Covid-19 cases, anum ang nakarecover, tatlo ang napatay, kag duha ka returning OFWs ang naga pabilin nga positive| Aksyon Ann Defensor
