Naga patigayon sa karon sang inventory ang syudad sang Bacolod angut sa numero sang mga quarantine facility nga ma apektuhan sa posible pag balik sang face-to-face classes sa 2021.
Martes sang hapon sang nag sapol ang mga myembro sang Local School Board sang syudad kag gin talakay ang plano sang syudad sa posible pag balik sang face-to-face classes.
Suno kay Councilor Renecito Novero, chair sang committee on education, gina lantaw ni Bacolod Schools Division Superintendent Gladys Amylaine Sales nga posible ang high school ang una nga maga balik sa face to face classes sa Pebrero 2021 samtang ang elementary ang posible mag balik sa 3rd ukon 4th quarter sang 2021.
Sa karon suno kay Novero, nga chair man sang quarantine center action team (QCAT), may 19 ka mga existing nga public school nga gin designar bilang quarantine center pero indi tanan ang gina usar bangud indi naman tuman kadamo ang naga abot sa Bacolod.
Sa masunod nga semana, liwat nga maga sapol ang QCAT kag Local School Board. | Aksyon Dale Salazar