BACOLOD MAGA SIRA ANG BORDER SA MGA TAGA ISLA SANG PANAY; FASTCRAFT WALA NA SANG BYAHE BWAS

Share on facebook
Share on google
Share on pinterest
Share on twitter
Share on print

Gin anunsyo ni Bacolod Mayor Evelio Leonardia nga maga sira ang borders sang syudad sa mga pasahero gikan sa Iloilo City, Probinsya sang Iloilo, kag bug-os nga Panay, lakip man ang Guimaras epektibo 11:59 karon sa gab-i, Hulyo 21.

Suno sa Alkalde, indi naman ma apektohan ang mga delivery sang essential goods kag cargoes.

Bwas nga adlaw, Hulyo 22, maga sira man ang borders sang Iloilo para sa mga taga Bacolod kag Isla sang Negrod, base sa anunsyo ni Iloilo Mayor Jerry Treñas.

Suno kay Treñas, ini nga tikang ang bangud sa pag saka sang Covid-19 cases.

Samtang, gina respeto ni Vice Mayor El Cid Familiaran ang desisyon ni Treñas.

Suno kay Familiaran, chair sang Bacolod IATF, ang tikang ni Treñas ang para sa kaayuhan sang tanan.

Nag panugyan si Familiaran sa tanan nga mag pangamuyo para indi mangin parehas sa Cebu ang sitwasyon sa Bacolod.

Bangud sini, wala na sang byahe ang mga fast craft kag iban pa nga passenger vessels sumugod buwas nga adlaw Hulyo 22, kasunod sang anunsyo sang duha ka mga alkalde.

Suno kay Philippine Coast Guard Negros Station Commander Jansen Benjamin, bilang pagsunod sa mando sang lokal nga panguluhan sang duha ka mga syudad, automatic na nga maga-untat ang byahe sang mga fastcraft kag iban nga passenger vessels.

Dugang pa ni Benjamin, magapadayon naman ang byahe sang mga cargo vessels kaangay na lamang sang Roll-on Roll-off (RoRo) para sa mga essential goods and services.

Ginkasubo sang mga shipping lines ang pagpasira sang mga borders sang syudad sang Bacolod kag Iloilo nga nagresulta naman sa pag-untat sang byahe sang mga passenger vessels.

Suno kay Frank Carbon sang Weesam Express, isa sa direkta nga maapektuhan sini ang mga empleyado sang mga shipping lines.

Nagapati si Carbon nga bangud sang pagbalik sadto sang byahe amat-amat nga nagsanyog ang ekonomiya sang duha ka mga lugar.

Nagalaum si Carbon nga temporaryo lamang ang pagpasira sang mga border. | Aksyon Dale Salazar, Aksyon John Diaz

MORE STORIES:

LIKE US ON FB

error: Ooops... You are not authorized to copy this content.