Aminado si Bacolod City ABC President kag Councilor Lady Gles Gonzales nga kalabanan sa mga Barangay sa siudad sang Bacolod may kakulangan angut sa implementasyon sang ‘Curfew fo minors’ nga ordinansa. Suno kay Gonzales, bisan ang iya barangay ang wala mahatagan sang naga-kaigo nga atensiyon ang pagpatuman sang ordinansa sang siudad kasunod nga nakatutok sila sa pagtapna sang ilegal nga droga kag ilegal nga panahor, nga pila sa mga nagapanguna nga kampanya sang karon nga administrasyon. Una diri, isa ka kaso sang pag pangluthang ang natabu sa Celine Homes Subdivision, Barangay Estefania, siudad sang Bacolod sadtong Domingo sang kaagahon nga nagresulta sang kamatayon sang isa ka menor de edad kag pagkapilas sang isa pa. Bangud sini, plano ni Gonzales nga tipunon ang tanan nga pinuno sang tagsa ka Barangay sa siudad para sa isa ka pagsapol, upod ang mga ahensiya nga may katungdanan ukon papel sa pag patuman sang ordinansa.
