Isa ka lapsag nga lalaki sa Barangay Cubay syudad sang La Carlota ang ginpangalan sa pandemic nga COVID-19.
Ang lapsag ang ginhingadlan kay John Covid Castillon.
Si John Covid ginbun-ag sadtong Abril 8, 2020 takna las 9:20 sang aga sa Valladolid District Hospital, sa banwa sang Valladolid.
Si John Covid ikaduha nga bata nanday Patrolman Jose Castillon Jr. kag Gemima M. Castillon.
Ang amay ni John Covid nadestino sa Bacolod City Police Office (BCPO) Police Station 6 kag isa ka frontliner samtang ang iloy naman sini isa ka part-time teacher sa La Carlota City College.
Sa interview sang Aksyon Radyo Bacolod kay Patrolman Castillon, ginpahayag sini nga ang John nakuha niya sa bibliya nga ang buot silingon glorious and merciful samtang ang COVID naman ginkuha niya sa subong nga pandemic.
Si John Covid ang ginbun-ag nga may kabug-aton nga 3.1 kilogram.
Handum ni Castillon nga mangin simbolo sang paghimakas kag pagpakabakod ang ila anak sa piyak sang pandemic. | Aksyon John Diaz