Patay ang isa ka 29 anyos nga babaye sang malapakan sang ceres bus sa National Highway, Crossing Buhian, Barangay Tooy, syudad sang Himamaylan mga las 2:20 sang hapon, kahapon.
Ang napatay ginkilala kay Lionesa Liamy Castor, nagapuyo sa Barangay Bantayan, syudad sang Kabankalan, samtang ang driver sang ceres bus ginkilala naman kay Ernesto Eliaga, 36 anyos nagapuyo naman sa Barangay Banago, Syudad sang Bacolod.
Sa imbestigasyon sang Himamaylan PNP, nagamaneho sa motorsiklo si Castor upod sa mga grupo sini nga mga riders sang may nag-overtake nga pick up sa natuo sini.
Nagtinguha kun tani ang biktima nga magsaylo sa higad sang dalan, apang wala sini natalupangdan nga may nag overtake man nga ceres sa iya tuo. N
Nasangit ang manibela sang motorsiklo sang biktima sa kilid sang ceres kag natumba nga gilayon nalapakan ang iya ulo nga may suksuk nga helmet.
Ginhingagaw pa dala sa Himamaylan District Hospital, apang gindeklara nga patay sang attending physician.
Yara naman sa paghinakop sang Himamaylan PNP ang driver sang Bus.
