Gin alegar nga gin abduct ang isa ka babaye sa area sang 19th street sakop sang Barangay 5, syudad sang Bacolod subong nga gab-i, Hwebes.
Sa interview sang Aksyon Radyo Bacolod sa isa ka 32 anyos nga lalaki nga nakakita sa insidente, ang babaye ang pwersa nga gin sulod sa toyota avanza nga naga duag sang itom.
Antes ang insidente, gin pahayag sang saksi nga ang babaye ang may ka istorya sa cellphone kag iya nabatian nga nag siling nga “diin kana?”
Suno sa saksi, may isa ka lalaki nga sakay sa avanza ang nagpanaug sa salakyan kag nakig-istorya sang makadali sa babaye.
Dugang pa sang saksi, matapos ang pila ka segundos may nag gwa nga duha ka lalaki sa salakyan kag isa sa ila ang nagapos sa biktima.
Samtang ang lalaki nga ka istorya sang babaye ang nag dalagan, kag gin lagas ini sang isa ka lalaki nga nag gwa sa salakyan apang tigayon nga nakapalagyo.
Ang avanza ang nagpalagyo padulong sa dalan Aguinaldo samtang nagliko naman padulong norte nga bahin sang dalan Lacson ang isa ka Toyota Innova nga puti nga ginapatihan back-up sang Avanza nga salakyan.
Sa paglaragway sang saksi, ang babaye ang nagapang-edaron sang 26-30 anyos; nagataas sang 5’6”, naka short kag sleeveless.
Sa karon, wala pa na blotter ang ini nga insidente sa Police Station 2.
