Patay ang Assistant City Engineer sang syudad sang Kabankalan bangud sa Covid-19.
Sa interview sang Aksyon Radyo Bacolod, ginpahayag ni Mayor Pedro Zayco, ang napatay naga-edad sang 48 anyos nga lalaki sang Barangay Talubangi, Kabankalan.
Sa record sang City Health Office, Nobyembre 14 sang ini ang magpadulong sa Bacolod upod ang co-workers kag pagkahapon, nagpauli sa iya puluy-an sa Kabankalan.
Nobyembre 6 sang ini ang magreport sa duty kag sa sunod nga adlaw ini ang nagbatyag sang hilanat.
Nobyembre 7 tubtub 12, siya ang nagtener sa iya puluy-an kag wala na magduty, kag Nobyembre 13 sang ini ang gin-admit sa pribado nga hospital sa Bacolod. Nobyembre 14 sang ini ang kuhaan sang RT-PCR test, kag Nobyembre 15 ala 1:30 sang kaagahon ginsaylo sa Corazon Locsin Montelibano Memorial Regional Hospital, kag alas 3 sang gindeklarar sang mga attending physician nga napatay.
Alas 12 sang udto sang gin-cremate ang bangkay sandig sa protocol sang Department of Health.
Sa sini man nga adlaw, ginpahibalo ang City Health Office nga positibo sa Covid-19 ang resulta sang swab test sa pasyente.
Ang pasyente nagabatyag sang balatian nga diabetes kag hypertension.
Ginpaidalom na sa lockdown ang City Engineers Office sang syudad.
Gin-lockdown man ang compound sang puluy-an sang engineer sa Barangay Talubangi nga malapit lamang sa City Hall, samtang naka-quarantine ang asawa sini.
Dugang pa ni Zayco, ginpaidalom sa home quarantine ang tanan nga mga empleyado assign sa city engineers office, kag natalana nga kuhaan sang RT-PCR test bwas nga adlaw.
Sa record sang City Health Office “as of November 15, 2020” ang Kabankalan ang may 398 Covid-19 confirmed cases, 339 recovered, 52 active cases kag 7 ang napatay. | Aksyon Marlon Genovea