Apat lamang ang nag positibo sa Covid-19 sa 544 ka mga tawo nga gin paidalum sa surveillance testing nag ligad nga Nobiembre 28 kag 29 sa syudad sang Bacolod.
Suno kay Executive Assistant Ernesto Pineda, pamuno sang sectoral concern office, ang nag positibo ang gina lakipan sang duha ka pulis kag duha ka riders matapos nag gwa na ang bilog nga resulta sang surveillance testing subong nga gab-i.
Ang surveillance testing ang gin patigayon para sa mga food delivery riders pero may pila ka mga sektor nga nag upod man sa aktibidad kaangay sang mga pulis sang Bacolod City Police Office.
Bangud sini, gina kabig ni Pineda, nga naga nubo na ang Covid-19 cases sa syudad pero padayun nga naga panawagan sa publiko nga indi mag kompyansa.
Nanawagan si Pineda sa mga rider nga wala pa nag paidalum sa test, nga bukas sa gihapon ang syudad para sila ang ma test sa maabot nga Disyembre 5 kag 6 sa Bacolod Respiratory Outpatient Center.
Sa amo nga petsa, ipaidalum man sa surveillance testing ang mga traffic enforcers sang Bacolod Traffic Authority Office, transport sector kag personnel sang Public Order Safety Office ukon POSO. | Aksyon Dale Salazar
