APAT KA MIEMBRO SANG PAMILYA PATAY SA MASSACRE SA BRGY. TANGUB, BACOLOD; ISA KA PERSON OF INTEREST GINKUSTODIYA SANG KAPULISAN

Share on facebook
Share on pinterest
Share on twitter
Share on print
(Crime Scene | BCPO Photo)

Patay ang apat ka myembro sang pamilya sa kaso nga multiple murder sa Gardenville Subdivision, Barangay Tangub, syudad sang Bacolod.

Sa imbestigasyon sang Police station 8 sa pagpanguna ni Police Major Joery Puerto, ang mga napatay ginkilala sa ila nanday Jocelyn Nombre, 59 anyos; John Michael, 35 anyos; Gemma Espinosa, 69 anyos kag isa ka lima ka tuig nga bata nga babayi nga ginkilala kay Precious. 

Suno kay Puerto, nagdangop sa ila estasyon si Jona Delos Santos las 10 kaina sang aga, Abril 7, agod kadtuan ang balay sang mga napatay matapos makabaton tawag gikan sa bana ni Jocelyn nga si Jonel nga nag alegar nga wala ini makasabat sa iya tawag sa sulod sang pila na ka adlaw.

Pag abot sang pulis sa lugar, wala sang tawo ang balay kag bukas ang puertahan sa kusina kag nagapanimaho ang lawas sang patay nga tawo.

Pagsulod sa balay, una nakita ang patay nga lawas sang lima ka tuig nga bata nga yara sa sofa kag sang ginlibot ang balay nakit-an sa ugsaran ang nakaputos sa habol nga lawas sang babayi kag lalaki samtang sa payag naman nakit-an ang isa pa ka bangkay. 

Sa inisyal nga palayag sang Scene of the Crime Operatives, sa ulo tanan ang pilas sang mga napatay nga ginapatihan nga ginpanglampusan.

Ginkumpirmar sang Don Salvador Benedicto PNP nga ila nadakpan sa Barangay Bunga, DSB ang ginatudlo person of interest nga ginkilala kay Christian Tulot, residente sang Barangay Malagabang, Concepcion, Iloilo.

Si Tulot, ginsugat sang Bacolod City Police station 8 sa DSB matapos may nakasugid nga didto siya naga tiner bilang driver sang wala na ginhingadlan nga doktor.

Ginpanginwala ni Tulot ang akusasyon nga siya ang may kahimuan sang krimen.

(Christian Tulot ginakabig Person of Interest)

Sa interview sa kay Tulot, gin alegar nga wala siya sang kapasidad agod himuon ang kaangay nga krimen sa iya man nga pakaisa kag mga tiya.

Gin angot naman ni Tulot ang persona nga ginkilala sa kay ascertain Joel Espinosa, nga iya tiyo, nga amo ang gin alegar naghimo sang krimen.

Sa alegasyon ni Tulot, may natabo sadto nga iya nakit-an nga ginkuga ni Joel si Michael kag ginsumbag ang utod sini nga si Gemma, nga amo ang iya ginalantaw indikasyon nga may kapasidad ini sa paghimo sang krimen.

Suno kay Major Puerto, ila ipaidalom sa DTA test kag forensic examination ang person of interest bangod sa nakit-an nga mga bagras sa iya kamot kag guya nga una gin alegar nga resulta sang iya pagkadisgrasya sa motorsiklo.

Suno kay Puerto, wala nagasalanto’ ang mga palayag sang person of interest.

Nakuhaan sang pila ka sachet sang ginasuspesuhan shabu si Tulot.

Nakuhaan mismo sa facebook live sang Aksyon Radyo sang ginpagwa sang person of interest ang isa ka pouch nga nakasulod ang tatlo tubtub apat ka sachet sang ginasuspetsuhan shabu kag mga wala na sang unod nga sachets, nga amo lang ang iya gin ako nga iya ginapanag iyahan.

Sa pihak sini, gin ako ni Tulot nga nag gamit siya sang illegal drugs sadtong Abril 1, Hwebes santo.

Sa karon, nagapadayon ang imbestigasyon sang kapulisan kag pagtipon sang dugang nga mga ebidensya. | Aksyon Eric Magbanua, Aksyon Eden Aboso, Aksyon Ann Defensor

What’s your Reaction?
+1
0
+1
0
+1
0
+1
0
+1
0
+1
0
+1
0

MORE STORIES:

LIKE US ON FACEBOOK

error: Ooops... You are not authorized to copy this content.