APAT KA MGA SAKADA GIKAN ANTIQUE NGA NAG ABOT SA NEGROS OCCIDENTAL NAG POSITIBO SA COVID-19

Share on facebook
Share on google
Share on pinterest
Share on twitter
Share on print

Apat  ka mga Migratory Sugarcane Workers ukon sakada ang nagpositibo sa Covid-19, sang sila ang ginpaidalom sa RT-PCR testing  sa  pag-abot sa Negros Occidental.

Suno kay Provincial Incident Command Team (PIMT) Commander Zeaphard Gerhart Caelian, ang apat kabahin sa kapin 300 ka mga sakada nga nag-abot sa Negros Occidental sadtong Oktubre 9,  halin sa probinsiya sang Antique.

Dugang pa ni Caelian, ginkuha na ang apat sa quarantine area kag ginsaylo sa isolation facility sa syudad sang Silay.

Ang 300 ka mga sakada amo ang una nga batch nga nag-abot sa probinsiya, agud magtrabaho bilang manugtapas sang tubo sa syudad sang Kabankalan.

Sila ang una nga gin swab sa pag-abot sa Bredco port Bacolod kag gin quarantine sa ila ginateniran nga kwarter.

Suno  kay Caelian, ginahulat pa ang resulta sang iban nga swab tests, samtang gintugutan naman nga magtrabaho ang mga nagnegatibo. 

Ginatos ka mga taga Antique ang nagapangayaw bilang karga tapas sa  tion sang  harvest season sang tubo, sa  Negros Occidental.

Samtang, may duha ka batch sang Migratory Sugarcane Workers ukon sakada ang nag-abot sa Negros Occidental halin sa Antique kaina sang aga, Lunes.

Ginpahayag ni Caelian,  alas 2 sang kaagahon sang nag-abot sa Bredco port ang 110 ka mga sakada kag 103 naman alas 4 sang kaagahon. Sila ang gilayon nga ginkuhaan sang RT-PCR test kag gin quarantine sa quarantine facility sang ila pagatrabahoan nga banwa ukon syudad.

Dugang pa ni Caelian, ini nga mga sakada ang natalana nga magtrabaho bilang manug tapas sang tubo sa  banwa sang Binalbagan, Isabela, La Castellana  kag syudad sang La Carlota.

Apang antis tugutan nga makatrabaho, kinahanglan anay masiguro nga sila ang negatibo sa Covid-19.  | Aksyon Marlon Genovea

MORE STORIES:

LIKE US ON FB

error: Ooops... You are not authorized to copy this content.