APAT KA BALAY SA BRGY MANDALAGAN, GIN LOCKDOWN

Share on facebook
Share on google
Share on pinterest
Share on twitter
Share on print

Ginlockdown ang apat ka mga puluy-an sa Purok 13, Barangay Mandalagan syudad sang Bacolod matapos nakitaan sang sintomas sang Covid-19 ang isa ka 77 anyos nga lalaki nga residente sang amo nga lugar.

Ginpahayag ni Barangay Kapitan Arturo Parreño, nagdesisyon ang barangay nga ipaidalom sa lockdown ang apat ka mga puluy-an samtang ginahulat ang resulta sang swab test nga ginpatigayon sadtong Martes sa probable case kag sa iya nga asawa.

Kabudlayan sa pagginhawa ang ginbatyag sang probable case.

Nagpanugyan si Parreño sa mga pumuluyo nga temporaryo likawan ang pagpalit sa lockdown area.

Ginpahayag man ni Parreño nga hatagan sang barangay sang ayuda ang indi magnubo sa 14 ka mga persona nga na apektuhan sang lockdown.

Gin pahamtang na ang barangay tanod para magbantay sa sitwasyon sa lugar.

MAAKOMODAR SA BOSS NAGSAKA SA 500 KADA ADLAW

Nagsaka na sa 500 ka mga tawo ang ma akomodar sang Bacolod Permits and Licensing Office (PLO) sa nagapadayon nga Business One Stop Shop sa Ayala Malls Capitol Central.

Suno kay Stela Rose Rayos, pamuno sang PLO, nagligad nga Enero 11 sang ila ginpasakaan ang numero sang mga kliyente nga nagaproseso sang business permit humalin sa 300 pakadto sa 500.

Dugang pa ni Rayos, sa karon, wala sang mga mayor nga reklamo nga nabaton ang ila talatapan sa nagapadayon nga aktibidad.

Nagpasiguro man si Rayos nga istrikto man nga ginamonitor ang attendance sang mga Barangay sa BOSS para sa pagisyu sang Barangay Clearance.

Tinalikdan nga Biernes, may pito ka mga Barangay nga wala sang tiglawas sa BOSS.

Nagapakita man sa datus sang PLO, nga mas madamo ang nagapa appointment walk-in sa Ayala Mall kag Bacolod Government Center ikomparar sa Online.

May yara na sang 10, 750 ang narehistro nga Negosyo sa Bacolod tubtob Enero 15.

Ang BOSS ang magalawig tubtob Marso 31, 2021. | Aksyon Dale Salazar

BARANGAY 18 MAY ARKILAHAN NGA LUGAR PARA TEMPORARY SHELTER SANG MGA WATCHER

Arkilahan sang Brgy. 18 council ang isa ka bakante nga lokal agud himuon nga temporary shelter para sa mga watchers sang mga pasyente sang Corazon Locsin Montelibano Memorial Regional Hospital (CLMMRH).

Ang arkilahan nga lugar ang nahamtang sa 2nd Cordova Road, Brgy. 18 syudad sang Bacolod kag may kadakuon nga 12×50 square meters.
Suno kay Kapitan Madeline Diaz sang Barangay 18, isa ka indi magpakilala nga indibidwal ang nagpakig-angut sa iya agud magbulig sa mga watchers pinaagi sa paghatag sang libre nga ilistaran.

Magapahamtang man sang 50 ka mga folding beds kag ulunan ang barangay agud indi na mabudlayan pa nga magpangita sang gamit ang mga watchers.

Dugang pa ni Diaz, wala labot sang bulig pinansyal magahatag man sang duha ka sako sang bugas ang nagdonar.

Nagalaum si Diaz nga magkooperar kag mangin responsable ang mga watchers. | Aksyon John Diaz

MORE STORIES:

LIKE US ON FB

error: Ooops... You are not authorized to copy this content.