ANAY KAPITAN NGA GIN-ALEGAR DRUG LORD SA CEBU, PATAY SA MANHUNT OPERATION SA BANWA SANG MURCIA

Share on facebook
Share on pinterest
Share on twitter
Share on print

Patay ang isa ka gin alegar drug lord sa man-hunt operation sang gintingob nga pwersa sang kapulisan kag iban pa nga law enforcement unit sa Brgy. Minoyan, banwa sa Murcia las 7:20 kaina sang aga, Lunes.

Ang napatay ang ginkilala kay Jennifer Mercader alyas hyper, lalaki, 43 anyos kag residente sang Brgy. Lugo, Borbon, Cebu.

Suno kay Murcia PNP Officer-In-Charge Police Lt. John Paul Tabujara, una nga nasiplatan si Mercader nga nagatinir sa Brgy. Alig banwa sang Murcia kag nagapamakal sang kasapatan.

Ginpahayag ni Tabujara nga nagsaylo gilayon sa Brgy. Minoyan si Mercader matapos nahibaloan nga ini ang ginamonitor sang Philippine Drug Enforcement Agency (PDEA).

Gintutukan sang station intelligence division sang Murcia PNP ang pagmonitor kay Mercader sa bulig sang mga impormasyon gikan sa Police Regional Offices 6 kag 7 kag kun sa diin sa sulod sang isa ka semana gilayon man nga gin-operate sang kapulisan.

Pagpaathag ni Tabujara, las dos palang sang kaagahon nagplastar na ang mga operatiba kag sang nagpalapit sa balay sang subject hinali nalang ini nga nagpalupok rasun kun ngaa napilitan nga magbalos ang kapulisan.

Igo sa dughan tuga sang pagluthang ang naangkon ni Mercader nga gintunaan sang iya kamatayon.

Narekober sa crime scene ang isa ka kalibre 45 nga armas-luthang, isa ka 12 guage shotgun, apat ka mga naglupok nga bala sang kalibre 45 nga armas-luthang, kag pila ka mga wala naglupok nga bala.

May nakuha man sa puluy-an ni Mercader nga walo ka bulto sang ginasuspetsuhan shabu nga may kabug-aton nga 40 gramos kag ginabulubanta nagabalor 480 mil pesos.

Ang bangkay ni Mercader ang gindala sa Villacrusis Funeral Parlor sa Brgy. Mansilingan syudad sang Bacolod.

Nahibaloan nga tuig 2018 sang nadakpan si Mercader sa probinsya sang Cebu sa kaso nga paglapas sa layi nga nagadumili sa paghupot sang ilegal nga armas kag droga apang nakapalagyo gikan sa Medellin District Jail sadtong Marso 5, 2019.

Si Mercadel ang anay Punong Barangay sang Brgy. Lugo, Borbon Cebu.

Magluwas sa kaso paglapas sa RA 10591 nagapangatubang man si Mercader sang kaso murder.

Si Mercader ang isa man sa Top 10 Most Wanted Person sang probinsya sang Cebu kag ginakabig bilang High Value Individual (HVI).

Ginkumpirmar man ni Bacolod City Police Office-City Drugs Enforcement Unit (BCPO-CDEU) Head Police Captain Leo Estopa nga si Mercader amo ang persona nga nakapalagyo sadtong Agosto 27, sa buy bust operation nga ginpatigayon sa isa ka balay sa Florenceville Subdivision, Brgy. Pahanocoy syudad sang Bacolod.

Si Mercader ang ginatudlo upod sa negosyo sang ilegal nga droga sang napatay sa buy bust operation nga si Jose Paterio Tolete, 42 anyos nga residente sang Brgy. Taculing syudad sang Bacolod.

Ginpasakaan man si Mercader sang kaso may angut sa pagbaligya sang ilegal nga droga.

Pagpahayag ni Estopa nga mga kaupdanan ni Mercado sa negosyo ang nagsapupo sa iya sa Bacolod matapos magpalagyo gikan sa Cebu. | Aksyon John Diaz

What’s your Reaction?
+1
0
+1
0
+1
0
+1
0
+1
0
+1
0
+1
0

HIGH SCHOOL STUDENT, PATAY SANG NALAMPOS ANG ULO SA DUTA SANG SUBA

Patay ang isa ka menor de edad sang malumos sa suba nga sakop sang Hacienda Antolanga, Barangay Tinongan banwa sang Isabela la 1:30 sang hapon, Domingo (Marso 17).

Ang biktima naga-edad sang 16 anyos kag isa ka high schoold student.

Suno kay Police Captain Rjay Dangarang, hepe sang Isabela PNP, nagpaligo ang menor de edad upod ang apat ka iban pa niya nga kaupdanan sa Citizen Advancement Training (CAT) sa ila bolothoan.

Ginpahayag ni Dangarang nga naglumpat sa suba ang biktima kag mahimo nalampos ang iya ulo sa duta bangud nga manabaw lamang ang suba.

Ulihi na lamang nga natalupangdan sang iya mga kaupdanan nga wala na makabutwa ang biktima.

Gindala sa ospital ang biktima bilang kabahin sang proseso kag gindeklarar nga dead on arrival ni Dr. Lladen Espallardo.

What’s your Reaction?
+1
0
+1
0
+1
0
+1
0
+1
0
+1
0
+1
1

QR CODE SA MGA COMMERCIAL SEX WORKER, GINSUHESTYON

Ginpahayag ni City Legal Officer Atty. Romeo Carlos Ting Jr. nga ginarekomendar nga hatagan sang QR Code ang mga Commercial Sex Workers (CSW).

Ini matapos ang inspeksyon sang City Health Office, DSSD, City Legal Office kag Permits and Licensing Office sa Goldenfield Commercial Complex kag nahibaluan nga iban nga CSW ang wala sang pink card.

Ang pink card ang ginahatag sa CSW para pamatuod nga hilway sila sa mga makalalaton nga masakit.

Ginpahayag ni Ting, sa inspeksyon, may yara man sang CSW nga ginadudahan nga menor de edad, pero nagpakita sang ID nga 19 anyos na ini pero ila ginakwestyon bangud natabunan ang iya itsura.

Ginatan-aw ni Ting nga wala sang bayolasyon kon may QR code ang mga CSW bangud seguridad man sang tawo ang ginahambalan kag ang ginakabalak-an nga may menor de edad sa sini nga sahi sang trabaho.

Sa record sang Bacolod CHO, sang 2023 may 159 ka pink card nga na isyu samtang 46 naman subong nga 2024.

What’s your Reaction?
+1
0
+1
0
+1
0
+1
0
+1
0
+1
0
+1
0

MORE STORIES:

LIKE US ON FACEBOOK

error: Ooops... You are not authorized to copy this content.