Patay ang isa ka gin alegar drug lord sa man-hunt operation sang gintingob nga pwersa sang kapulisan kag iban pa nga law enforcement unit sa Brgy. Minoyan, banwa sa Murcia las 7:20 kaina sang aga, Lunes.
Ang napatay ang ginkilala kay Jennifer Mercader alyas hyper, lalaki, 43 anyos kag residente sang Brgy. Lugo, Borbon, Cebu.
Suno kay Murcia PNP Officer-In-Charge Police Lt. John Paul Tabujara, una nga nasiplatan si Mercader nga nagatinir sa Brgy. Alig banwa sang Murcia kag nagapamakal sang kasapatan.
Ginpahayag ni Tabujara nga nagsaylo gilayon sa Brgy. Minoyan si Mercader matapos nahibaloan nga ini ang ginamonitor sang Philippine Drug Enforcement Agency (PDEA).
Gintutukan sang station intelligence division sang Murcia PNP ang pagmonitor kay Mercader sa bulig sang mga impormasyon gikan sa Police Regional Offices 6 kag 7 kag kun sa diin sa sulod sang isa ka semana gilayon man nga gin-operate sang kapulisan.
Pagpaathag ni Tabujara, las dos palang sang kaagahon nagplastar na ang mga operatiba kag sang nagpalapit sa balay sang subject hinali nalang ini nga nagpalupok rasun kun ngaa napilitan nga magbalos ang kapulisan.
Igo sa dughan tuga sang pagluthang ang naangkon ni Mercader nga gintunaan sang iya kamatayon.
Narekober sa crime scene ang isa ka kalibre 45 nga armas-luthang, isa ka 12 guage shotgun, apat ka mga naglupok nga bala sang kalibre 45 nga armas-luthang, kag pila ka mga wala naglupok nga bala.
May nakuha man sa puluy-an ni Mercader nga walo ka bulto sang ginasuspetsuhan shabu nga may kabug-aton nga 40 gramos kag ginabulubanta nagabalor 480 mil pesos.
Ang bangkay ni Mercader ang gindala sa Villacrusis Funeral Parlor sa Brgy. Mansilingan syudad sang Bacolod.
Nahibaloan nga tuig 2018 sang nadakpan si Mercader sa probinsya sang Cebu sa kaso nga paglapas sa layi nga nagadumili sa paghupot sang ilegal nga armas kag droga apang nakapalagyo gikan sa Medellin District Jail sadtong Marso 5, 2019.
Si Mercadel ang anay Punong Barangay sang Brgy. Lugo, Borbon Cebu.
Magluwas sa kaso paglapas sa RA 10591 nagapangatubang man si Mercader sang kaso murder.
Si Mercader ang isa man sa Top 10 Most Wanted Person sang probinsya sang Cebu kag ginakabig bilang High Value Individual (HVI).
Ginkumpirmar man ni Bacolod City Police Office-City Drugs Enforcement Unit (BCPO-CDEU) Head Police Captain Leo Estopa nga si Mercader amo ang persona nga nakapalagyo sadtong Agosto 27, sa buy bust operation nga ginpatigayon sa isa ka balay sa Florenceville Subdivision, Brgy. Pahanocoy syudad sang Bacolod.
Si Mercader ang ginatudlo upod sa negosyo sang ilegal nga droga sang napatay sa buy bust operation nga si Jose Paterio Tolete, 42 anyos nga residente sang Brgy. Taculing syudad sang Bacolod.
Ginpasakaan man si Mercader sang kaso may angut sa pagbaligya sang ilegal nga droga.
Pagpahayag ni Estopa nga mga kaupdanan ni Mercado sa negosyo ang nagsapupo sa iya sa Bacolod matapos magpalagyo gikan sa Cebu. | Aksyon John Diaz
