Patay ang amay, samtang nakaluwas ang anak sa pagpangluthang sa Purok Tayum-an, Barangay Sta. Rosa, banwa sang Murcia.
Ang biktima ginkilala kay Leonardo Garcia Jr., 34 anyos sang Barangay Minoyan sa amo man nga banwa, apang temporaryo nga nagapuyo sa lugar sang insidente.
Suno kay PLt. John Paul Tabujara, hepe sang Murcia PNP, nagapungko ang biktima upod ang menor de edad nga anak nga lalaki sa guwa sa puloy-an sang iya iloy sang ginluthang sa wala makilala nga mga suspetsado.
Dugang ni Tabujara, ang suspetsado nagbakal pa sang gasolina sang motorsiklo sa tiange sang iloy antis siya ginluthang sa wala mahibaluan nga rasun.
Ginhingagaw pa dala sa Murcia Rural Health Unit ang biktima, apang gindeklara nga patay.
Nakarekober sang otoridad sang apat ka basiyo sang kalibre 45 sa lugar sang insidente. Inisyal nga motibo amo ang timalos sang suspetsado sa pamilya. | Aksyon Bryan Morden
