Pamolitika! ini ang ginakabig nanday Atty Aaron Lirazan kag Atty. Ariel Malones angut sa akusasyon batuk sanday Vice Governor Eugene Jose Lacson, San Carlos Vice Mayor Rene Gustillo, anay 1st District Congresaman Jules Ledesma kag negosyante Antonio Mariano Cui nga gin alegar protektor sang iligal nga droga sa probinsya sang Negros Occidental.
Suno kay Lirazan, wala sang basihan kag himo-himo lang ang affidavit nanday Sheryl Alboro, Prudencio Mahilum, Alfredo Hulleza kag Cipiriano Jiminez nga gin-alegar ginpadala sa National Bureau of Investigation- Manila.
Dugang ni Lirazan wala sang kapasidad ang apat nga mag-akusar sang ila kleyente bangud nagapakita sa ila affidavit may kakulang ang ila ideya.
Indi mapalayag nanday Lirazan kag Malones kun sin-o ang sa likod okon personalidad nga naga-uyat kanday Alburo, Hulleza, Mahilum kag Jiminez.
Nagapati ang kampo ni Lacson nga pamolitika gid lamang bangud gin timing gid nga ginpaguwa ang affidavit sa pag-endorso kay Lacson para Gobernador sa 2019 nga midterm elections.
Perjury, libel kag iban pa nga kaso ang gintun-an karon sang mga abogado sang mga akusado agud igapasaka batok kanday Alburo, Hulleza, Mahilum kag Jiminez.
Una diri, gin-akusar sanday Lacson, Ledesma, Gustilo kag Cui nga protektor sang iligal nga droga halin kay Peter Lim sa Cebu nga gin alegar drug trader.