Na apektuhan ang 30 ka mga pamilya sa pag sealed-off sang pila ka pamalay sa Purok Masanag I, Brgy. 26, syudad sang Bacolod. Ini matapos nag positibo sa Covid-19 ang isa ka senior citizen nga indi LSI kag indi man OFW.
Suno kay Kapitan Jhun Mharby Orola sang Brgy.26, base sa impormasyon gikan sa ila nga Barangay Health Emergency Response Team, ang pasyente ang nag kadto sa hospital nagligad nga Hulyo 17 matapos nag batyag sa kabudlayan sa pag ginhawa.
Ang pasyente ang gin paidalum sa swab test kag nag gwa ang resulta nga positibo ini sa Covid-19 infection sang Martes nga adlaw, Hulyo 21.
Suno kay Orola, lakip sa gin sealed-off amo ang compound nga may mga renters nga gina panag-iyahan sang pasyente kag pila ka illegal settlers sa sagwa sang compound.
Ang pasyente ang naga isahanon nga naga pangabuhi sa iya balay.
Suno kay Orola, nag hatag na sang ayuda ang Barangay sa bulig man sang syudad kag talatapan ni Congressman Greg Gasataya.
Nag patigayon man sang disinfection ang Bacolod CDRRMO sa lugar. | Aksyon Dale Salazar