250 ka mga pamilya ang apektado sang zonal lockdown sa Villa Barbas 2 Purok Mainuswagon Brgy. Zone 2 syudad sang Cadiz Negros Occidental.
Sa interview sang Aksyon Radyo Bacolod, ginpahayag ni Mayor Salvador Escalante Jr., ginpaidalom sa lockdown ang amo nga lugar agud mapungan ang pagdamo sang kaso sang Covid-19.
Dugang pa sang alkalde, ipaidalom sa ‘swab testing’ sang Cadiz City Health Office (CCHO) ang isa ka miyembro sang kada pamilya.
Ang sin-o man nga magpositibo sa Covid-19, ipaidalom man sa swab test ang iban pa nga myembro sang pamilya sini.
Ginpasiguro ni Escalante sa mga apektado nga pamilya, nga may nagakaigo nga bulig ang syudad, pareho sang suplay sang pagkaon kag iban pa nga kinahanglanon.
Sa record sang CCHO Abril, 5, 2021, ang Brgy. Zone 2 ang may 10 ka mga COVID-19 active cases.
Sa kabug-usan ang syudad sang Cadiz ang may 50 ka mga aktibo nga kaso, sa diin 36 sa mga ini ang mga local transmission. | Aksyon Marlon Genovea
