Nakumpiskar ang balor 24 milyones pesos sang ginasuspetsuhan shabu sa 3 ka persona sa buybust operation sang Regional Drug Enforcement Unit (RDEU) sa Purok Datiles, Brgy. Handumanan syudad sang Bacolod las 9 kaina sang aga, Martes.
Ang subject sang operasyon ginkilala kay Carline Lunares.
Nadakpan man ang utod sini nga si Richard Lunares kag live-in partner sini nga si Nester Briñosa.
Suno kay Lt. Thurslie Castillo, team leader sang RDEU, isa ka bulan nila nga gin-surveillance si Lunares kag subong nga adlaw nag transakyon ang otoridad sa utod sini nga amo ang gin-alegar runner ni Carline.
Dugang pa ni Castillo, may ideya na sila kon diin nagakuha sang suplay si Lunares apang nagpamalibad nga ipagwa para indi ma kompromiso ang ila operasyon.
Ginlaragway ni Castillo nga “armed and dangerous” ang nasambit nga grupo nga padayon nila gina-monitor.
Nagapati si Castillo nga ang nagapalakad sang padayon nga baligyaanay sang ilegal nga droga ang yara na priso sa Muntinlupa Jail kag may yara lang sang runners sa gwa sang prisohan. | Aksyon Eden Aboso