Nagsungka sa katapo sang 62nd Infantry Battalion sang Philippine Army ang isa ka 23 anyos nga babaye nga gin-alegar miyembro sang New People’s Army ukon NPA.
Ini ang ginkilala kay Jenny Montano y Dela Cruz kag tumandok sa Sitio Sitio Maatop, Barangay Sangke, Banwa sang Hinobaan.
Suno kay 3rd Infantry Division Spokesperson Army Major Cenon Pancito, dala sa pagsungka ni Montano ang isa ka 357 kag mga bala sini. Dugang ni Pancito, 18 anyos palang sang nagsulod sa NPA si Montano sadtong tuig 2016, matapos mainganyo sa mga nauna nga miyembro sang grupo.
Nangin anay squad lider sang squad 2 sang NPA si Montano nga naga-operar sa sur nga bahin sang Negros Occidental kag pila man ka lugar sa Negros Oriental.
Palayag pa sang spokesperson, isa sa rasun sa pagsungka sini, amo ang pagsungka una sang nagrecruit sa iya sadto.
Madumduman sadtong bulan sang Mayo may tatlo ka NPA nga nagsungka sa Banwa sang Hinobaan kag sa ila amo ang recruiter ni Montano.
Si Montano gilayon nga igasulod sa Enhanced Comprehensive Local Integration Program ukon E-CLIP sang gobyerno agud makabaton sang benepisyo para sa pag-umpisa sang iya pangabuhi nga matawhay. | Aksyon Bryan Morden
