Ginklaro ni Bacolod Vice Mayor El Cid Familiaran nga ang Oktubre 19 ang magapabilin nga nonworking public holiday sa syudad sang Bacolod apisar nga may ginpasar nga R.A 7044 ang kongreso kag senado nga nagadeklarar sang Hunyo 18 bilang Charter Day sang Bacolod.
Photo CTTO
Suno kay Familiaran kilalahon subong nga tuig ang Oktubre 19 bilang charter pa sang Bacolod bangud wala paman mapirmahan ni Presidente Rodrigo Duterte ang hagna nga ginduso ni Congressman Greg Gasataya.
Dugang pa ni Familiaran sandig sa impormasyon nga gin palab-ot sa iya sang talatapan ni Senate Majority Floor Leader Juan Miguel Zubiri yara na sa talatapan ni Duterte ang aprubado nga hagna kag pirma na lamang ang kulang.
Suno sa bise-alkalde apisar nga mapirmahan pa ni Duterte ang hagna antes ang Oktubre 19 indi pa ini mapatuman bangud ang layi ang maga epekto lang pagkatapos sang 15 ukon 30 dias ma aprubahan sang presidente.
Nagpagwa man sang Legal Opinion si City Legal Officer Joselito Bayatan napetsahan Oktubre 15, nga naga siling nga Oktubre 19 pa ang charter sang Bacolod sandig sa R.A 7724 samtang wala pa ma-repeal ang ini nga layi.