PRESO sa custodial facility sang Police Station 4 ang duha ka mga lalaki nga nag panghatag sang gin alegar ‘libelous’ nga sulat sa mga talatapan sa Bacolod Government Center kaina sang aga, Septembre 5.
Gin kilala ang mga nadakpan nga sanday Perfecto Senyeres, 60, kag Mark Anthony Diaz, 39, sang Helvetia Heights, Barangay Villamonte, syudad sang Bacolod.
Ang duha nga nadakpan ang na aktuhan nga nanagtag sang sulat nga na-address kay Jaime Llagano Mabilin sang Presidential Complaint Center Office angut sa gin alegar mga anomaliya nga transaksyon sang Leonardia administration.
May yara man sang open letter nga na-address kay Presidente Rodrigo Duterte angut sa gin alegar graft and corruption nga na komiter ni Leonardia.
Naulamid man sa sulat ang ngalan sang mga pila ka mga opisyal sang syudad lakip man sanday Eduardo Ravena, Joselito Bayatan, Eduardo Joseph Cuansing, Samuel Montoyo, Rolly Baliguat kag Marlon Solidum.
Ang sulat ang pirmado nanday Senyeres, Diaz, Edgar Cadagat, Antonio Wong kag Nemesio Demafiles.
Gin pahayag ni Seneyeres, nga nakahibalo ini kon ano ang kaundan sang sulat kag gin sugo lamang siya sang iya mga kaupdanan.
Suno kay Senyeres, tinutuyo sang sulat amo nga makita sang mga opisyales ang ila suloktun kuntane nga kapin isa ka milyon ka pesos ukon ang bayad sang syudad sa construction materials nga gin-deliver sang Penjan Builders and Supply sa idalum sang Puentevella Administration tuig 2016.
