180K SANG GINAPATIHAN SHABU, NAKUMPISKAR

CLO, NAGSABAT SA NAGA KWESTYON SA MANOKAN COUNTRY REDEVELOPMENT PROJECT

Wala sang may nakit-an problema legal si Bacolod City Legal Officer Atty. Romeo Carlos Ting Jr. sa redevelopment project sang Manokan Country.

Nagpagwa sang apat ka pahina nga legal opinion si Ting matapos nga nagpadala sang reklamo si Roger Reyes, Vice President sang Task Force Kasanag, nga naga kwestyon sa legalidad sang lease agreeement sa tunga sang LGU kag SM Prime Holdings Inc.

Ginpahayag ni Ting, ang reklamo ang ginsumiter sa SM kag ini ang gintugyan sa LGU.

Ginpahayag ni Ting, legal ang 40 ka tuig nga pag renta sang SM sa Manokan nga kabahin sang public market sang LGU base man sa ordinansa kag wala man ini gin deklarar nga heritage site.

Ini matapos ginakwestyon sang tagreklamo nga tubtob lamang 25 ka tuig ang lease agreement para mangin constitutional.

Suno kay Ting, kon basehan ang layi, tubtob 90 ka tuig ginatugutan ang pag renta sang propedad sang gobyerno.

Ginpaathag pa ni Ting, ang chicken inasal amo ang gindeklarar nga cultural property sang syudad kag indi ang Manokan Country.

LOVE NEGROS GINAHULAT ANG DESISYON SANG UNEGA SA MANGIN KANDIDATO BILANG BISE GOBERNADOR

Ginahulat sa gihapon sang local political group nga Love Negros ang desisyon sang local political party nga United Negros Alliance (UNegA), kun sin- o ang mangin kandidato sini sa pagka-bise gobernador sa 2025 nga eleksyon.

Suno kay Governor Bong Lacson, ang sin-o man nga mapilian sang UNegA amo ang iya makatandem sa eleksyon.

Nobyembre 2023, ginkompirmar ni Vice Governor Jeffrey Ferrer ang iya plano nga pagbalik papili bilang kongresista sang ika-apat nga distrito sang Negros Occidental, bangud magaretiro na ang iya asawa sa politika, nga subong amo ang incumbent 4th district Congresswoman.

Basi sa kasugtanan sang UNegA kag Love Negros, dapat pagadesidihan sang UNegA ang magabulos kay Ferrer bilang bise gobernador.

Si Ferrer ang may ikaduha na nga termino bilang bise gobernador sang Negros Occidental kag nagserbe man nga kongresista sang ika-apat nga distrito sang probinsiya umpisa 2007 tubtub 2016.