18 ANYOS NGA LALAKI, GIN DAKOP MATAPOS NAG PALUPOK SANG ARMAS LUTHANG
Posted by:
News Desk
|
December 19, 2019
at
5:45 pm
Share on facebook
Share on pinterest
Share on twitter
Share on print
Nagderetso sa custodial facility ang isa ka hubog, matapos magpalupok sa Purok 3, Barangay Cabacungan, banwa sang La Castellana sadtong Miyerkules sang gab-i.
Ang suspetsado ginkilala kay John Romar Madrigal, 18 anyos kag nagapuyo sa Sitio Ubay, Barangay Guinpanaan, banwa sang Moises Padilla.
Base sa imbestigasyon sang otoridad, una nga nag-inom sang makahulobog nga ilimnon ang suspetsado upod sa mga abyan sa is aka birthday party.
Nagluntad ang kinagamo sa amo nga grupo kag nagpa-uli ini kag pagbalik may bitbit nga improvised nga 12 gauge shotgun kag nagpalupok.
Natabuan nga yara ang Barangay Tanod kag nadakop ini kag karun natalana na nga pasakaan sang kaso. | Aksyon Bryan Morden
Ginakonsiderar ni Mayor Albee Benitez nga i-terminate ang kontrata sang joint venture agreement sa tunga sang Primewater kag BACIWA ukon re-negotiation.
Sa press conference, Lunes, ginpahayag ni Benitez nga nagpangayo ini sa BACIWA sang listahan sang mga bayolasyon sang Primewater sa ginsudlan nga kontrata.
Isa sa ginbasehan ni Benitez nga bayolasyon amo ang section 5.1.2 sang kontrata, nga sa sulod sang lima ka tuig halin 2020, dapat masiguro ang 24 oras nga tubod sang tubig sa katapusan sang ikaduha nga tuig, nga tubtob karon wala na comply.
Ginapasabat ni Benitez ang BACIWA kon ano ang ila nga nahimo sa mga bayolasyon sa kontrata kag kon may penalidad nga ginpapanaug batuk sa Primewater.
Nagapangayo man si Benitez sa BACIWA sang water security plan nga indi lamang sabat sa epekto sang El Niño kundi diin tubtob ang water supply sang syudad.
Suno sa Alkalde, naga claim ang BACIWA nga 90 million liters a day (MLD) lamang ang kinahanglan sang Bacolod pero 125 MLD ang ginarekomendar sang mga eksperto para sa syudad matapos ang ginpatigayon nga verification.
Ginaduso ni Benitez nga may yara sang buffer plan sang tubig ang syudad kag nagsuhestyon nga ang mga deep wells sang Primewater ang dapat reserba sa tion sang emerhensya kag indi ini pag himuon nga primary source of water.
Liwat nga ginpakamalaot ni Benitez ang mga bag-o nga post sa social media nga nagapakita sa malubog nga tubig kag ang suhestyon nga ilisan na ang madaan nga mga tubo.
Bangud sini, nagapahayag si Benitez nga wala sang concrete investment ang Primewater para mapaayo ang ila serbisyo matapos ang apat ka tuig.
Ginklaro ni Benitez nga ‘done deal’ na ang JVA sang Primewater-Baciwa antes ini nagpungko bilang alkalde sang Bacolod.
ALBEE: WALA PA SANG MAY NAPIRMAHAN NGA KONTRATA MATAPOS ANG WATER SUMMIT
Tubtob karon wala sang kontrata nga nakita si Mayor Albee nga ginsudlan ang Baciwa-Primewater kaupod ang water supplier matapos ang water summit nagligad nga Enero 2024.
Ginpahayag ni Benitez, may mga water supplier nga nagahimo karon sang inisyatibo nga mag install sang mga water pipes bisan wala pa sang ginkasugtan nga kontrata.
Suno kay Benitez, may mga verbal agreement pero wala sang may nakita nga signed contract nga gin promisa sa iya nagligad nga water summit.
Una na nga ginkasugtan sa water summit nga ma deliver sang Baciwa-Primewater ang 20MLD nga shortage sang tubig sa sulod sang anum ka bulan.
Ang injection point 2 sang Bacolod Bulk Water Incorporated sa Murcia ang target makadeliver sang 15 million liters a day samtang magahalin naman sa spring water sa Barangay Alangilan ang dugang nga 5 million liters per day.
May proposal man nga magtukod sang water supply kag filtration facility kag maka deliver sang dugang nga 20MLD halin sa Matab-ang river.
Nadugangan pa sang tatlo ka kumpirmado nga kaso sang pertussis ang syudad sang Bacolod.
Bangud sini nagsaka sa anum ang kabug-usan nga kaso sang pertussis sa syudad halin Enero 1 tubtob Abril 6, 2024 nga datus sang Bacolod City Health Office.
Sa report sang Bacolod CHO, nakagwa na sa hospital ang anum ka mga pasyente nga naga edad isa ka tuig panubo.
Duha ka kaso ang na record sa Barangay Tangub samtang tig isa naman sa Barangay Granada, Handumanan, Taculing, kag Villamonte.
May lima naman ka samples ang nag negatibo sa masakit samtang may duha pa ka samples nga pending pa ang resulta sa RITM.
