Nakuha ang 168,000 ka pesos nga balor sang ginasuspetsuhan shabu sa buy bust operation sa Purok Matawhay, Brgy. Binicuil syudad sang Kabankalan hapon sang Enero 3.
Dakop ang subject sang operasyon nga si Jeoffrey Quirogo, 38 anyos sang Brgy. 16 syudad sang Bacolod. Naaresto man sanday Edcel Salgado, 43 ang edad sang Brgy. Tagda sa banwa sang Hinigaran, Carlito Nueva España, 48 anyos sang Brgy. Binicuil kag ang live-in partner sang subject nga si Myrna Sanchez, 50 anyos sang Brgy. Mandalagan, Bacolod.
Suno kay Kabankalan City PNP Chief of Police Lt. Col. Jonel Guadalupe, umpisa nagligad nga tuig nagsugod na ang surveillance batuk sa subject nga masami nagapadulong sa lugar agud magtransaksyon sang ilegal nga droga.
Dugang pa ni Guadalupe, si Quirogo kag ang live-in partner sini nga si Sanchez lunsay newly identified drug personality samtang drug surrenderer naman si Salgado kag España sa ila tagsa ka mga lugar.
Narekober sa operasyon ang lima ka bulto sang suspected shabu, duha ka improvised toother, kwarta, drug paraphernalia kag ang salakyan ni Quirogo. Priso karun ang apat sa custodial facility sang Kabankalan City PNP. | Aksyon John Diaz