Nalakip ang 10 ka mga Pinoy Crew nga taga Western Visayas sa na missing nga barko sa kadagatan sang Japan.
Sa report sang Aksyon Radyo Iloilo, gin pahayag ni OWWA Regional Director Rizza Joy Moldes, lakip sa sakay sa missing nga barko ang isa gikan sa Bacolod, isa ang gikan sa Iloilo City kag walo ang gikan sa Iloilo province. Gina verify pa sang OWWA ang iban nga addresss sang mga Pinoy crew bangud sa National Capital Region ang nabutang sa ila nga database.
Suno kay Moldes, nag pakigangut na ang ahensya sa pamilya sang mga missing. Sa nahibaluan, 39 ka mga Pinoy Crew ang nalakip nga sakay sa Gulf Livestock 1 nga na missing bangud sa Typhoon Maysak.
Tatlo ka mga Pinoy ang na-rescue pero isa sa ila ang gin bawian sang kabuhi sa hospital.
Ang barko ang may karga nga masobra 5 mil ka mga baka ang gikan sa New Zealand kag padulong kuntane sa Tangshan, China. | Aksyon Dale Salazar, Aksyon Radyo Iloilo